Þessar vanillu muffins eru einstaklega bragðgóðar og safaríkar og eru í miklu uppáhaldi hjá bæði stórum sem smáum. Hægt er að fylla þær með allskyns góðgæti en í þetta skiptið, er börnin mín og ég útbjuggum þessar muffins með sunnudagskaffinu, skárum við niður súkkulaði með þurrkuðum berjum og settum þrjá bita í hverja muffins.

Vanillu Muffins
24 stk

3 dl sykur
4 egg
100g smjör, brætt
1 dl mjólk eða súrmjólk
6 dl hveiti
3 tsk lyftiduft
4 tsk vanillusykur
1 tsk salt

Sykur og egg þeytt vel saman. Bræddu smjörinu og mjólkinni bætt saman við og því næst þurrefninu. Muffinsformin sett í muffinsbrett og formin 3/4 fyllt.
Bakist við 200°c í 15 – 20 mínútur.

Hugmyndir að fyllingu:

• Hvítt súkkulaði og frosin hindber, perlusykri stráð yfir
• Súkkulaðidropar
• Frosin eða fersk bláber
• Rababari (skorinn í strimla og velt uppúr kanilsykri)
• Plómur (skornar í bita og velt uppúr kanilsykri)