Heimsins bestu Oreo Cupcakes!

Til hamingju með daginn kæru Íslendingar nær og fjær!
Hér í Kristiansund var veðurspáin ekki mjög spennandi fyrir daginn.. en við fjölskyldan vorum búin að bjóða Íslendingunum sem við þekkjum hér í Kristiansund í grill og útifjör og það leit út fyrir að við myndum þurfa að vera inni við vegna veðurs.
En veðurguðirnir hafa hlustað á okkur í þetta sinn og fengum við 14°c, regn- og vindfrítt veður og alls vorum við 31 sem komum saman hér í dag.
Það að hafa kynnst þeim íslendingum sem við þekkjum hér hefur gert þessi tvö ár sem við höfum búið hér mun auðveldari og skemmtilegri en ella. Einstaklega frábært og yndislegt fólk í alla staði 🙂

Ég nefndi þessar einstaklega góðu Oreo bollakökur þegar ég deildi með ykkur uppskriftinni af Oreo Ostakökunni. Þessar bollakökur hafa aldeilis slegið í gegn, „bestu kökur í heimi“ segir maðurinn minn, og þá á hann við það besta sem hann hefur smakkað af bakstri yfir höfuð! Það er nú ekki annað hægt en að deila þessari uppskrift með ykkur!

Oreo Bollakökur

Bollakökurnar
200 g hveiti
40 g kakó
3 tsk lyftiduft
1 tsk salt
240 g sykur
80 g ósaltað smjör, við stofuhita
2 egg
2 tsk vanilludropar
200 ml mjólk
16 Oreo kökur

Kremið
175 g ósaltað smjör, við stofuhita
350 g flórsykur, sigtaður
1 tsk vanilludropar
1 – 2 msk mjólk
3 – 4 oreo kökur, muldar

Ofninn hitaður við 180°c

Raða bollakökuformum á muffinsbretti og heilar oreo kökur settar í botninn

Sigta hveiti, kakó, lyftiduft og salt saman í skál

Í annari skál eru smjörið og sykurinn hrær vel saman

Bæta vanilludropunum útí og einu eggi í einu, hræra varlega

Að lokum er mjólkinni og hveitiblöndinni hrært saman við

Deiginu hellt yfir oreo kexið, formið fyllt að minnsta kostið 3/4 part af forminu.
Bakað í 18 – 20 mínútur.

Kremið

Smjörið, flórsykurinn og vanillan hrærð vel saman í nokkrar mínútur, bæta mjólkinni saman við, lítið í einu.
Oreo mulningurinn er hrærður saman við kremið, ein matskeið í einu þar til þú færð skemmtilega „cookie“ áferð og útlit á kremið.